कास्की – पोखरामा स्कुटर चोरीको आरोपमा तीन जनालाई प्रहरीले पक्राउ गरेको छ । पक्राउपछि अनुसन्धान गर्ने क्रममा अन्य थप दुई वटा चोरीको स्कुटर, पाँच थान मोबाइल सेट बरामद भएको प्रहरीले जनाएको छ ।

पोखराबाट  पक्राउ पर्नेमा १९ वर्षका सन्दीप श्रीमल स्थायी घर गोरखा साविक थालाजुङ गाबिस–४ हाल पोखरा–३ नदीपुर बसोबास  गर्दै आएका थिए।

अन्य दुई किशोरहरुको परिचय प्रहरीले गोप्य राखेको जिल्ला प्रहरी कार्यालयका प्रवक्ता एवं प्रहरी नायब उपरीक्षक सुवास हमा लले जानकारी दिए ।

फूलबारीबाट बुधबार बिहान १ बजे स्कुटर चोरेर भाग्दै गरेको अवस्थामा उनीहरु पक्राउ परेका थिए । प्रहरीले साउन २५ गते पोखरा–४ गणेशटोलस्थित सुकमाया कामीको घरको कम्पाउण्डबाट चोरी भएको ज्ञानकुमारी गुरुङको ग६प ६३४२ नम्बरको रातो डियो स्कुटर पोखरा–१२ फूलबारी सफामार्गमा फेला पारेको थियो ।

त्यसैगरी साउन २६ गते राति पोखरा–४ रामकृष्ण टोलबाट चोरी भएको धनमाया गुरुङको नामको ग १७ प ३०५१ नम्बरको रातो डियो स्कुटर र साउन २७ गते राति साढे १२ बजे पोखरा–११ प्रगतिटोलबाट हराएको सिर्जना मल्ल ठकुरीको ग५प ३९१५ नम्बरको निलो डियो स्कुटर पोखरा–२६ बुढीबजारबाट बरामद गरिएको प्रहरी प्रवक्ता हमालले जानकारी दिए ।

उनीहरुलाई चोरी तथा डाँका कसुरअन्तर्गत जिल्ला अदालतबाट बुधबार पाँच दिनको म्याद थप गरी अनुसन्धान जारी प्रहरीले जनाएको छ ।

अन्तिम पटक अध्यावधिक गरिएको 1 महिना अगाडी 249 जनाले हेर्नुभएको

प्रतिक्रिया दिनुहोस्